Mingutsitsinani ineriartorneq | WWF Denmark

Mingutsitsinani ineriartorneq



 rel=
Inuit children playing, Moriusaq, Greenland
© naturepl.com / Bryan and Cherry Alexander / WWF

Avatangiisit ataqqillugit ineriartorneq

Piginneqatigiiffiit nunanit assigiinngitsuneersut uuliasiorlutillu aatsitassarsiortut, tamarmik miliaarterpassuarnik kaaviiaartitaqarlutik, Kalaallit Nunaata tamarmi kaaviiaartitanit annertunerungaartumik kaaviiaaritallit, ukiuni makkunani nunarsuatsinni qeqertat annersaannik soqutiginnilluarput. Kalaallit Nunaanni immap, sermersuup qaarsullu ataani pisuussutinik annertoqisunik tunisassiorniarlutik piareersimallutik.

Kalaallit Nunaanni aningaasaqarniarneq pitsanngorsarniarlugu demokrati naapertorlugu inuiaqatigiinnik ineriartortitsinermi, niuertut assuartut nunanit tamaneersut, inatsisinik alanngaarsinnaasut qoqassiissutaasinnaasunillu sungiussilluarsimasut pisortat allaffeqarfiisa naligiittut suleqatiginiartussaavaat.

Aatsitassanit sapinngisamik iluanaaruteqarluarnissaq soorunami Kalaallit Nunaannit kissaatigineqarpoq, pinngortitalli kulturillu innarlerneqannginnissaannut aamma piumasaqaateqarluni.

ICC suleqatigineqarpoq

Tamatuma qulakkeernissaanut tapertaarusuppugut. Nunarsuatsinni pinngortitamik ilersuiniaqatigiiffiup WWF-ip taamaammat Inuit kattuffiat ICC Greenland 2012-imi suleqatigilerpaa.

ICC, Issittumi tamani inuit piginnaatitaaffiinik, kulturiinik oqaasiinillu sorsuutiginnittoq suleqatigalugu Kalaallit Nunaanni ineriartortitsisariaqarnermi sapinngisamik mingutsitsisoqannginnissaa qulaakkeerniarparput.

Kalaallit Nunaanni pisuussutit tunisassiariniarlugit ingerlatsiviit nunanit assigiinntsiuneersut qinnuteqaraangata, tusarniaanernit akissutit tutsuiginartut tunniussuunnerisigut suleqataasarpugut.

Assersuutigalugu uuliasiornermi aatsitassarsiornermilu tamanna pisarpoq.

Innuttaasut peqataatinnissaat pisariaqarpoq

Tamatuma saniatigut, Kalaallit Nunaanni aatsitassanik tunisassiornissaq pillugu aalajangiiniarnerni innuttaasut peqataatinneqarnissaat qulakkeerniarlugu suliniaqataavugut.

Innuttaasut isumaat qarsupiinarlugit ineriartortitsisoqartussaanngilaq.

ICC suleqatigalugu aamma misissuisoqartarlunilu nalunaarusiortoqartassaaq, tutsuiginartumik tunngaveqarluni Kalaallit Nunaanni oqallinnerit pitsanngorsaqqinnissaat siunertaralugu.

Taanna saqqummerpat uani atuarsinnaassavat: wwf.dk.

ICC-p suleqaatiginerani aamma Kalaallit Nunaanni suliniuteqartut naalakkersuisunut attuumassuteqanngitsut avatangiisinillu illersuiniaqatigiit suleqatigiinnerisa patajaallisarneqarnissaat aamma kissaatigineqarpoq.