Silap pissusaa allanngoriartortoq | WWF Denmark

Silap pissusaa allanngoriartortoq



 rel=
Isbjørnens arktiske hjem trues af klimaforandringer
© Paul Nicklen/National Geographic Stock / WWF-Canada

Issittoq marloriaammik kissariarneruvoq

Silap pissusaata allanngoriartornera Issittumi immikkut malunnaateqarpoq, tamaani inuit uumasullu najukkaminnit nuuttariaqarnissaat annertuumik unammigassartaqassaaq. Silap pissusaata allanngoriartorneranut naleqqussarnissamik issittumi sulissutiginnittunut WWF suleqataarusuppoq.

1980-imiilli Issittoq nunarsuatta sinneranut sanilliullugu marloriaammik kissariarsimavoq. Minnerunngitsumik Kalaallit Nunaata kitaata sineriaa sukkasuumik kissakkiartorsimavoq sikuerukkiartorlunilu. Sermersuaq imaatalu sikua aatsaat taama sukkatigisumik aakkiartorput.

Imaani sikup allanngorarnera Issittumi innuttaasunut 4 miliuuninut unammillernarpoq. Upernaakkut sikuiaarnerusalerpoq sikulu sivisunerusumik qajannartarluni. Taamaammat siukumi piniarneq aalisarnerlu ajornakusoornerulerput. Ukiuunerani kangerluit sikugaangata siku aamma aqqutissaasaraluarpoq. Sikuli qajannarlitillugu illoqarfiit nunaqarfiillu tikinneqarsinnaajunnaartarput.

Uumasut aamma periarfissaalatsipput. Uumasummi ilaat sikumi sikullu sinaani uumasuupput – soorlu nannut aarrillu. Ullumikkut Issittumi nannut 22-31.000 miss. amerlassuseqarput. Pinngortitaleriffimmiillu paasissutissat naapertorlugit, 2012-imut sanilliullugu 2060-imi nannut 30 procentimik ikileriarsimassapput.